Bizkaia laranjaz tindatu da ADHNa ikusarazteko eta osasun-arreta bidezkoa eta ekitatiboa eskatzeko

Iragan urriaren 27an, ADHNaren Egun Nazionala zela-eta, FEAADAHk eta EUSARGHIk sustatutako Estatuko kanpainarekin bat egin zuen Bizkaiak, arreta-defizitaren eta hiperaktibitatearen nahasmendua (ADHN) ikusaraztea eta eragindako pertsonentzako benetako arreta publiko bidezkoa eskatzea xede.

Egun horretan, probintziako hainbat eraikin eta monumentu laranja kolorez argiztatu ziren, ADHNarekiko sentsibilizazioaren eta nahasmenduarekin bizi direnekiko elkartasunaren ikur. Nabarmendutako espazioen artean, honako hauek daude: Barakaldoko udaletxeko erlojua, Barakaldo Antzokia eta Gurutzetako Ospitalea; Barrikako emakumeen biribilgunea; Bilbon San Mames eta PKF Attest eraikina; Derioko udaletxea; Getxon Zugatzarte kaia eta Portu Zaharreko eta Alangoko igogailuak; Muskizeko udaletxea eta Kultur Etxea; Ondarroan Plaiko Zubia; Portugaleteko Pando-Aisia kiroldegia; Santurtziko Casa Torre jauregia; Sestaoko udaletxea; Sopelako udaletxea; eta Zallako liburutegia eta San Pedroko Gernikako arbola.

Halaber, AHIDA elkarteak informazio-standa jarri zuen Gurutzetako Ospitaleko sarrera nagusian, eta nahasmenduan eta elkartearen lanean interesa zuten pertsona ugari hurbildu ziren. AHIDAko lantaldeak galderak erantzun zituen, dibulgazio-materialak banatu zituen eta ADHNaren eta Bizkaian erabilgarri dauden baliabideen inguruko informazioa eman zuen.

Egun horretan, Euskadin ADHNaren osasun-arretan adostasun- eta ekitate-gabezia salatu zituzten, probintziaren araberako diagnosi-irizpideen arteko desberdintasunak nabarmendu zituzten, eta osasun-zentroetan esaldi iraingarriek jarraitzen dutela adierazi zuten. Federazioak osasun-autoritateei premiazko bi konpromiso eskatu zizkien: ebidentzia zientifikoan oinarritutako irizpide berdinak ezartzen dituen arreta goiztiar eta prebentiboa, eta ADHNa kronikoa dela aitortzea, bizitza osoan zehar osasun-laguntza bermatuz.

Argiztapen-kanpaina eta AHIDAren jarduera informatiboa baliagarriak izan dira isiltasuna hausteko, gizartea sentsibilizatzeko eta ADHNa duten pertsonentzat eta haien familientzat justizia eskatzeko. Manifestuak azpimarratu duenez, «osasun mental publikoa ezin da posta‑kodearen ezta familia baten erosahalmenaren araberakoa izan».