AHIDAk unibertsitate esparruan ADHNren inguruko sentsibilizazioa bultzatu du bi boluntariotza azoketan

Ahidako boluntarioak Juan José Etxeberria Deustuko Unibertsitateko errektorearekin eta Javier Arellano Nazioarteko Ikerketa eta Harremanetarako errektoreordearekin izan ziren, besteak beste. Argazkigintza https://www.flickr.com/photos/deusto/albums/72177720329189922/

Bilbo, 2025eko urria

AHIDA elkarteak Bizkaiko unibertsitate zentroek antolatutako bi boluntariotza azoka garrantzitsutan parte hartu du berriki. Helburua izan da elkartearen lana komunitate akademikora hurbiltzea eta etorkizuneko profesionalek arreta-defizitaren eta hiperaktibitatearen nahasmenduaren (ADHN) arretarekiko duten konpromisoa sustatzea.

Lehenengo azoka iragan irailaren 18an Deustuko Unibertsitatean egin zuten eta bigarrena, aldiz, urriaren 1ean Begoñako Andra Mari Irakasleen Unibertsitate Eskolan (BAM). Bi egunetan  irakasle zein ikasleek interes nabaria agertu zuten AHIDAk ADHN duten pertsonei eta haien familiei laguntzeko egiten duen lanaren inguruan.

Azokak elkartearen eta boluntario izan daitezkeenen arteko topagunea izateaz gain, inguru akademikoan dibulgatzeko eta sentsibilizatzeko aukera baliagarria ere izan dira; hala, gaur egun lanean dabiltzan irakasleengana eta etorkizuneko hezitzaileak izateko prestakuntza prozesuan daudenengana heltzeko aukera eman diote elkarteari. AHIDAren parte hartzeari esker, ADHN duten ikasleen beharrizan zehatzak ikusarazi dira eta hezkuntzaren arloan begirada inklusiboagoa eta ulerkorragoa sustatu da.

Ikasleei bereziki interesgarria iruditu zaie elkarteak eskaintzen duen etxez etxeko eskola laguntza. Programa horren bidez, etorkizuneko irakasleek elkarteko familiekin zuzenean lan egiteko aukera daukate eta lehen eskutik ezagutu ditzakete ADHN duten haurren eskolako egunerokotasuna eta aurre egin beharreko zailtasunak. Esperientzia praktikoak trebakuntza aberastu ez ezik, teoria akademikoaren eta hezkuntzako errealitatearen arteko lotura irmotzen du.

Azoketara bertaratzearekin batera, AHIDAk prestakuntzarekin, inklusioarekin eta boluntariotzarekin duen konpromisoa berretsi du eta ikaskuntza prozesuan aniztasunari laguntzeko prestatuago dagoen gizarte enpatikoagoaren aldeko apustua egin du.